Murlun yn dangos nad oes dim yn rhwystr i blant a phobl ifanc sydd â nam golwg
Mae plant a phobl ifanc wedi dod at ei gilydd i baentio murlun sy’n adlewyrchu eu teimladau a’u profiadau o golli golwg.
O dan arweiniad yr arlunydd graffiti Andy Birch, aethant ati i ddefnyddio caniau i chwistrellu paent i greu graffiti yn swyddfa Cymdeithas Deillion Gogledd Cymru ym Mangor.
Aeth y grŵp ati i gynllunio a phaentio murlun lliwgar sydd yn addurno’r ganolfan adnoddau ac yn croesawu pawb sydd yn ymweld.
Dywedodd un o aelodau’r grŵp, Lauren: “Dwi wedi mwynhau bod yn rhan o grŵp o sydd wedi creu rhywbeth sy’n mynd i aros yna am byth. Syniad fi oedd gwneud gwenynen ar y wal oherwydd maen nhw’n gallu bod yn resilient ac i ddangos bod byw gyda nam golwg ddim yn gorfod bod yn rhwystr i neb gyflawni pethau.”
Dywedodd prif weithredwr yr elusen, Steven Thomas: “Roedd hi’n wych i gael y plant a’r bobl ifanc sydd gyda nam golwg yn cydweithio mor hapus â phositif wrth greu graffiti sy’n ddarn celf liwgar iawn.
“Roedd yn brofiad newydd iddyn nhw ddefnyddio caniau i chwistrellu paent ar wal wedi iddyn nhw benderfynu ar gynllun wrth drafod gyda’r artist Andy Birch.
“Roedd y digwyddiad hwn yn un o nifer o rai yr ydym yn bwriadu eu trefnu dros y misoedd nesaf i gynnig cyfleoedd i’r plant a phobl ifanc ddod at ei gilydd a rhannu profiadau positif.
“Mae croeso i unrhyw un sydd eisiau rhagor o wybodaeth I’n ffonio ni.”
Os oes rhywun eisiau dod i weld y murlun, mae croeso ichi gysylltu yn y lle cyntaf drwy anfon at admin@nwsb.org.uk
