Sesiynau dringo yn llwyddiant mawr
Roedd sesiynau dringo i blant a phobl ifanc yng nghanolfan Beacon, Caernarfon yn llwyddiant mawr gyda phawb wedi mwynhau.
Trefnwyd y digwyddiad gan Nick Thomas, swyddog datblygu gyda Chymdeithas Deillion Gogledd Cymru gyda chefnogaeth gan y Royal Society for Blind Children (RSBC) a Guide Dogs Cymru.
Roedd yn gyfle i blant a phobl ifanc sydd â nam golwg a’u teuluoedd i gyfarfod a’i gilydd a chael hwyl a rhannu profiadau a straeon.
Cynhaliwyd dau sesiwn – un ar gyfer plant rhwng 4-12 oed a’r llall i bobl ifanc 12-17.
Roedd y digwyddiad yn gymaint o lwyddiant fel y bydd y Gymdeithas yn mynd ati i drefnu un arall yn y dyfodol.
Dywedodd Yusuf, un o’r bobl ifanc a gymerodd ran: “Dwi wedi mwynhau bod yn y Beacon climbing a wnes i ddysgu pethau am ddringo a ballu.”
Ychwanegodd Amir: “Diolch i’r bobl am drefnu hwn. Dwi wedi mwynhau lot.”
Dywedodd Nick, swyddog datblygu gyda Chymdeithas Deillion Gogledd Cymru: “’Da ni newydd gael sesiwn yma yng nghanolfan ddringo Beacon yng Nghaernarfon i blant a phobl ifanc sydd â nam golwg gael dod a gwneud sesiwn ddringo.
“Wnes i drefnu’r sesiwn yma gyda’r bwriad o gael plant a phobl ifanc sydd yn byw eu bywyd efo nam golwg i gael cyfarfod plant a phobl ifanc eraill sy’n mynd drwy’r un peth. Ond ar ben hynny hefyd, roedd rhieni'r plant a’r bobl ifanc yn cael cyfle i gyfarfod i ddod at ei gilydd a rhannu profiadau a chael sgwrs am y petha’ sy’n mynd ymlaen.
“Dwi’n meddwl fod y diwrnod wedi bod yn llwyddiant mawr. ‘Dwi wedi mwynhau gweld y plant a’r bobl ifanc yn mwynhau eu hunain, yn gwthio’u hunain ac yn cymryd her i fynd fyny rhai o’r waliau yma sydd yn y Beacon.
“Da ni yn gobeithio gwneud mwy o sesiynau tebyg i hwn yn y dyfodol a chael mwy o blant a phobl a’u teuluoedd at ei gilydd eto. Diolch yn fawr iawn i bawb ddoth yma a chymryd rhan ac i’r aelodau o staff a’r timau eraill am ddod yma i’n cefnogi. Mae o wedi bod yn ddiwrnod ffantastig a da ni yn hapus iawn. Diolch yn fawr.”
Dywedodd Kim Pearson, o'r Royal Society of Blind Children: "Rydym newydd gael sesiwn hyfryd yn y Beacon Crazy Climb gyda llawer o'r plant a'r teuluoedd rwy'n gweithio gyda nhw.
"Mae wedi bod yn bleser cwrdd â phawb yn bersonol. Mae wedi bod yn ddigwyddiad gwych. Byddai'n braf cael gwneud rhywbeth fel hyn eto. Diolch yn fawr."
Ychwanegodd Jen Collins, gweithiwr adsefydlu o Guide Dogs Cymru: "Rydyn ni wedi cael bore braf yma heddiw yng nghanolfan ddringo Beacon.
“I mi, y peth gorau am y diwrnod yw gweld y plant yn cael cyfle i fod gyda phlant eraill â nam ar eu golwg o'r ardal a'r rhieni i gyd yn cael cyfle i siarad gyda'i gilydd a bod gyda'i gilydd.
"Roedd yn neis iawn i'w weld ac roedd ei angen yn fawr. Mae hi wedi bod yn fore hyfryd, felly diolch yn fawr iawn.”
