Taith gerdded odidog ger Llyn Trawsfynydd

Daeth 28 o gerddwyr gyda ni ar ein taith gerdded ddiweddaraf i ardal Trawsfynydd – a phump o gŵn tywys.

Arweinydd y daith oedd David P Jones a Robat Davies, y ddau’n wardeiniaid gydag Awdurdod Parc Cenedlaethol Eryri.

Wedi inni gyfarfod ger Canolfan yr Ymwelwyr, fe wnaeth David ein harwain ar daith gylchol hamddenol tua 4.5 milltir o hyd i Brif Argae Llyn Trawsfynydd.

Mae Llyn Trawsfynydd ychydig yn fwy na Llyn Tegid, llyn naturiol mwyaf Cymru.

Creuwyd Llyn Trawsfynydd drwy godi pedwar argae i gyflenwi dŵr i orsaf bŵer Maentwrog.

Cyflogwyd cannoedd o Wyddelod i wneud y gwaith adeiladu ar yr argae.

Collwyd rhagor na 20 eiddo greu’r llyn gan gynnwys o leiaf dwy fferm - Brynhir a Llwynderw.

Yn 1965 defnyddiwyd dŵr o’r llyn hefyd i oeri atomfa niwclear Trawsfynydd a ddechreuodd gynhyrchu trydan yn 1965 ar gost o £103m.

Fe’i caewyd yn 1991 gyda’r gwaith o’i glanhau a’i datgomisiynu am gymryd 100 mlynedd.

Yr atomfa yw un o gyflogwyr mwyaf yr ardal.

Mae pysgod i’w cael yn y llyn ond mae nofio wedi’i wahardd oherwydd pryderon am ymbelydredd.

Cafodd y ffilm First Knight ei ffilmio yn yr ardal.

Wedi cael toriad am ginio ger y prif argae, fe gerddon ni drwy Goed Caersaeson cyn dychwelyd yn ôl i'r dechrau.

Roedd y tywydd yn braf gydag awel hyfryd a’r golygfeydd o’r mynyddoedd tuag at yr Wyddfa a draw i Flaenau Ffestiniog yn odidog.

Fe fwynhaodd pawb y daith ac roedd yn braf dychwelyd i Ganolfan a chaffi Prysor ar fin y llyn i gael diodydd a chacennau ar y diwedd cyn anelu yn ôl yn y bws i Fangor.