Cân am ‘le tywyll’ i ysbrydoli eraill sy’n byw gyda nam golwg

Mae cerddor ifanc sydd â nam golwg newydd ryddhau ei sengl cyntaf yn sôn am ei brofiadau o fyw gyda nam golwg.

Dywedodd Phill Jones, 22, o Gaernarfon fod y gân ‘Diolch i Chdi’ yn sôn am ei brofiad o “fod mewn lle tywyll ac unig pan yn ifanc.”

Meddai Phill, sy’n gweithio i gwmni o gyfreithwyr, mai neges y gân yw dweud “Diolch” i’w holl ffrindiau a theulu am eu cefnogaeth a bod yna olau ar ddiwedd cyfnod tywyll mewn bywyd. 

Fe ysbrydolwyd Phill gan y canwr Elidyr Glyn a’r band poblogaidd Bwncath i ddechrau cyfansoddi caneuon gwreiddiol. 

Meddai Phill: “Ma' ysgrifennu caneuon yn ffordd i mi allu dangos emosiwn a fy nheimladau. 

“Hefyd dwi’n gobeithio ysbrydoli pobl eraill sydd â nam golwg i wireddu eu breuddwydion a mynd amdani mewn bywyd – a dim gadael i’r nam golwg eu dal nhw yn ôl.”

Recordiwyd ‘Diolch i Chdi’ yn Stiwdio Sain, Llandwrog, Caernarfon a’r cynyrchydd oedd Robin Llwyd Jones.

Am ragor o wybodaeth, cysylltwch gyda Phill Jones Phillip.miwsig@outlook.com neu 07799318760