Diolch yn fawr i Gapel Seilo am rodd £1,000 i Gymdeithas y Deillion

Mae Cymdeithas Deillion Gogledd Cymru yn ddiolchgar iawn i aelodau Capel Seilo, Caernarfon am eu rhodd werthfawr o £1,000 fydd yn hwb mawr.

Dewisodd aelodau’r capel ddwy elusen i gasglu arian iddynt eleni sef Cymdeithas Deillion Gogledd Cymru a hefyd elusen Cancr y Brostad.

Mae’r ddwy elusen wedi derbyn yr un maint o arian.

Fe godwyd yr arian drwy gynnal Ffair Nadolig a boreau coffi gyda swyddog cyfathrebu’r Gymdeithas Hywel Trewyn yn bresennol mewn un achlysur i sôn am waith y Gymdeithas.

Heddiw, (Mawrth 23, 2026) aeth Hywel i dderbyn yr arian gan bump o aelodau pwyllgor gwaith y capel, Dorothy Williams, Edwina Morgan, Eirwen Williams, Alwena Lewis a Marian Jones.

Dywedodd Edwina Morgan: “Oedd hi’n braf cael cyflwyno'r £1,000 i Gymdeithas Deillion Gogledd Cymru.”

Meddai Alwena Lewis: “Oeddan ni’n ymwybodol iawn fod yna rhai o aelodau’r capel yn cael budd mawr o waith y Gymdeithas.”

Ychwanegodd Dorothy Williams: “Mae yna gymaint o bethau yn cael eu cynnig (gan y Gymdeithas) i helpu pobol.”

Dywedodd prif weithredwr Cymdeithas y Deillion, Steven Thomas: “Mae’r Gymdeithas yn wirioneddol ddiolchgar i aelodau Capel Seilo am eu haelioni a’u caredigrwydd parhaus.

“Maent wedi bod yn gyfeillion ffyddlon inni ers nifer o flynyddoedd, ac mae eu cefnogaeth yn parhau i wneud gwahaniaeth mawr i fywydau pobl sy’n byw gyda nam golwg ledled y gogledd.

“Mae’r rhodd o £1,000 yn adlewyrchu eu hysbryd cymunedol a’u hymrwymiad i helpu eraill. Rydym yn wirioneddol ddyledus iddynt, ac ar ran pawb sydd wedi elwa o’u haelioni dros y blynyddoedd, hoffwn ddiolch o galon iddynt. Mae eu cyfeillgarwch a’u haelioni yn goleuo bywydau pobl ac yn rhoi gobaith go iawn.”