Diwrnod agored llwyddiannus yn Llyfrgell Bangor!
Daeth nifer dda o bobl draw i Lyfrgell Bangor ddoe (dydd Llun, Hydref 6) i ddiwrnod agored i bobl sy’n byw gyda nam golwg.
Trefnwyd y diwrnod gan Cymdeithas Deillion Gogledd Cymru - North Wales Society of The Blind a Llyfrgelloedd Gwynedd Libraries i hyrwyddo ein gwasanaeth llyfrau llafar sef GWRANDO.
Rydym eisoes wedi trefnu dyddiau agored yn llyfrgelloedd Caernarfon a Phorthmadog.
Mae’n fwriad hefyd i gynnal dyddiau agored eraill yn y dyfodol mewn llyfrgelloedd eraill.
Bob blwyddyn, mae'r Gymdeithas yn cynhyrchu 12 llyfr llafar Cymraeg i oedolion a 12 llyfr i blant.
Mae'r recordiadau hyn ar gael yn rhad ac am ddim yn y llyfrgelloedd ar CD, MP3 neu i'w lawrlwytho neu gellir eu prynu gan y Gymdeithas fel rhan o'i gwasanaeth GWRANDO.
Roedd arbenigwr Adsefydlu Gweledol y Gymdeithas hefyd yn bresennol, gan ddangos ac egluro'r amrywiaeth o gymhorthion ac offer arloesol sydd ar gael i bobl sy'n byw gyda nam golwg.
Cafwyd cyfle hefyd i fwynhau perfformiad cerddorol byw gan Phill Jones, y canwr-gyfansoddwr talentog o Gaernarfon sy'n byw gyda nam golwg.
Mae Phill yn ganwr ac yn adnabyddus am rannu ei stori ac ysbrydoli eraill.
