Tywydd braf a thaith bleserus o amgylch Y Felinheli

Daeth 20 o gerddwyr ar ein taith gerdded gyntaf o’r flwyddyn newydd a hynny o gwmpas Y Felinheli, Gwynedd.

Roedd y daith gylchol hon yn gyfle gwych i bawb fwynhau cwmnïaeth ac ystwytho’r corff a hynny yn yr awyr iach tra’n mwynhau golygfeydd godidog o’r Afon Menai.

Mark ac Elaine Roberts oedd arweinwyr y daith bedair milltir, tair awr a hanner o hyd.

Fe wnaethon ni ymgynnull wrth ymyl tafarn a bwyty’r Garddfôn.

Roedd y golygfeydd yn odidog gyda’r haul yn gwenu uwchben Y Felinheli.

Fe wnaethon ni gerdded i fyny’r allt allan o’r pentref ac ar hyd y Lôn Las – y llwybr cerdded a beicio sy’n cysylltu’r pentref gyda Chaernarfon.

Fe gawsom ni ein cinio ym Mhlas Menai lle’r oedd byrddau picnic ar gael yn ogystal bwyd, diodydd a thoiledau.

Fe anelon ni wedyn yn ôl tuag at bentre’r Felinheli gan gerdded i fyny’r llwybr at Y Wern, uwchben.

Fe gerddon ni wedyn yn ôl at y man cychwyn gyda phawb nawr yn edrych ymlaen at y daith nesaf fis Chwefror.

Mae’r teithiau, fel arfer, yn cael eu cynnal ar y trydydd dydd Mercher ymhob mis. Rydym yn trefnu teithiau ble mae yna doiledau ar ganol a diwedd y daith.

Os ydych eisiau rhagor o fanylion, ffoniwch Bethan Sage Williams yn swyddfa Cymdeithas Deillion Gogledd Cymru 01248 353604 neu bethan@nwsb.org.uk